“ HARMEE ”

“ HARMEE ”

~

Coqorsikoo utuu hin margin 

Ol jechuukoo utuu hin argin 

Uumaan akka sin fudhanne banee hulaa 

An ilmikee harka raaseen boo’aa bula!

Kanumaafan‚ 

Jiruukoo’sa dhagaa qocaa 

Ciruudhaafan karaa boca.

Addakootiin gaara dhoosaa 

Galmakoottan faana loosa!

Ta’us garuu‚...

Bo’oon namni lukaan ce’u naaf hurufa

Dooniin kaaniif dhagaa fe’u na urgufa.

Orma cinaaf lafa ejjechuun waan salphaadha

Na arginaan irri dachii naaf talbaadha!

Akka kanaan yoo carraankoo na dheessitu

Shaxeen gaabbii yoo dirrakoo madeessitu‚...

Sagaleekee sana baqa

Suuqa keessaan suuqa soqa!

Hangakeetti caba eeltee cabaa nyaachaa

“Maal rakkatte?” naan jechuunkee na maraacha!

Kanaafidha kan faannikoo  si baqattu

Malee ‘aayyo’ bar yaadnikoo sin dagattu!

Yaa deesseekoo‚...!

Siif milkiinkee kadhatnikee waariif guyyaa

Fayyaa ta’ee nagaan bahee galuu kiyya!

Anaaf garuu hiikni guutuun milkaa’uudhaa

Hanga boosse bakka boontu si kaa’uudha!

Nan amana‚...

Guyyaa keessaa jabaa tokko guyyaa guddaa 

Cidha milkiif gaafan waamu qomoo hundaa 

As gahuukoof akka taate lafee dugdaa‚...

Nan lallaba; nan mammaaka sitti marmee 

Hangasitti‚... kadhannaakee cimsi ‘harmee’!

Madda: Aga Guda NL  

Kanaa'ol (Walaloo)

Gaaf heddu,

Kobbeen buta waraqaan fida

Jechi na dida

Gaaf heddu,

Waliinan gaha kobbeef waraqata

Kanin barreesse garaa na hanqata

Gaaf gaaf,

Jecha qaba

Humnan dhaba

Gaaf gaaf,

Fedha qaba

Jechan dhaba

-

(Kana dura dhimmeera)

Eessumarraa eegalee eessattimee goolabu?

Maal fa’aa tatarreessee dhugaakee katabu? 

(Kana booda dhiiseera)

Waanan jedhee hinfixne kankee hin jalqabu!

Ati, 

hin akkeeffamtu 

hin fakkeeffamtu 

hin barreeffamtu

Jechaan ni dhibamta

Jireenyaan himamta!

Kanaa'ol (Walaloo)

Dhagawuun dadhabe

Dhagawuun dadhabe

. . .

Innis… natti himuu jalqabe

Anis…gurran itti qabe…..

* * * * *

“…..Attam ture wantisaa….., attam turee laataa?

Bishaan harkaa baadheen nan muge fakkaata

Irriba fokkistuu; irribi kaleessaa

Dhagaa gubbaa taa’ee abjuu natti odeessa

Marga gubbaa taa’een gurrakoo itti qeensa;

Huurrii fi aara woyii mataatti na aguugaa

Haadhakoo gudeedee abbaakoo ajjeese; wabiif harki dhiiga

Utuman kana arguu saamunaa dhaaf bishaan baadheen jala fiiga

Hoo abbaa kootii…jedheen baqachuu dhaaf fiiga

Nan fachisan jedhaa, irreetu na laafaa, hantuutootu na muga

Kan akka koo hin jiru, namni qalbiin deegaa.

Yammuun rafee ka’u, narra ijaajjee kolfa

Haadhakoo gudeedee abbaakoo ajjeesee inno ammayyuu inkolfa

Isanni natti kolfu, anis duukaan kolfa

Uggum yaa anaa kanaa, nama qalbiin hoffaa!”

* * * * *

Maali hin qaanawuu maalo, kana yeroo natti himu

Du’ee biyyoo hanyaatu qileen haa dhidhimu

Dhagawuun dadhabe

Iddoosaan qaanayee, mataan gad-nacabe

Maal namni hin qaanofne…kana natti odeessaa?

Du’ee biyyoo ha nyaatu salgan namaa keessaa.

22.11.2017

Helsinki/Finland

By: Zelealem Aberra Tesfa

Yaadannoo Goototaa

MAALIIN IJA SI GUUTU?

(Gaaffii qalbiinkoo jalaa hinbaane, ilmoon namaa ilmoo namaaf waan gochuun itti ulfaatu garuu muraasni raawwatanii sammuu namaa keessatti gaaffii guyyuu kan uuman, yaadannoo irra ce'ee gaaffiiwwan uumaman keessaas waggoottan kurnan darbaniif gola miirakoo keessa kan naanna'e, gatiin ba'e tasa akka hin taaneef luugama yookaan mil'annaa adeemsakoo ittiin akeeku gaaffii namoomaa, walaloo ‘maaliin ija si guutu?’ jedhu kanaanin tuquuf yaale. Gatiin Oromoomaaf ba'e, ba'aa jiru guddaadha.)

*

Maaliin ija si guutu!?

-

Maqaakoo dhahattee,

fiigdee baate manaa

Of hin mararsifanne,

aarsaa taate anaa!

-

'Guduunfaakee furu malee,

an takka hin gammadu'

Inni ati naan jette,

garaa kootii hin badu.

-

Addunyaa na kabajju,

na badhaasuuf jettee

Osuma ifaajjuu,

kichummaan hiddamte

Namummaaf miidhamte

Saanduqatti hidhamte.

---

Mil'uukee achi fagoo,

dhugaa si dammaqse

Harki sammuun dhiphoo,

dhiibee afaan si maqse

Kaayyoo si hanqise

Kaachookee hambise.

-

Akkuma warra kaanii

Jettee dhimma isaanii

Hin cufanne afaani!

Jiruukee achi haatee,

Quuqqaa lammiif kaatee,

Rirmi qorqee si nyaate.

(A'aa)

-

Lapheen nama gaddeef,

harki haatee sin fuutuu

An karaatti ati hafteef,

maaliin ija si guutuu?

* * *

Kanaa'ol Badhaadhaa tiin

Wareegamaaf

2016

Guyyaa yaadannoo goototaa

04/15/2024

𝐀𝐚𝐲𝐲𝐨𝐥𝐢𝐢𝐟 𝐠𝐮𝐦𝐚𝐚𝐭𝐚!

𝐀𝐚𝐲𝐲𝐨𝐥𝐢𝐢𝐟 𝐠𝐮𝐦𝐚𝐚𝐭𝐚!

Harmeeko deessseeko –

Dandeessuu guddisaa

Imimmaan fuulakeewo –

Natu sirraa qoorsaa

Hinbooyin haadhakoo –

Imimmaanke lolaafte

Lolaa imimmaankeetiin –

Garaa na rooraaftee!

--

Joortuuko yaa deessuu –

Toltuu haadha firaa

Na duraa hinraafamin –

Rabbituu nuuf jiraa

Waan baay’ee ilaaltee –

Garaanke moogofte

Rakkoon biyya lafaa –

Namarraa si looftee!

Akka madda lagaa -

Imimmaan lolaaftaa

Anoo ofin dadhabee –

Maaf garaa naraafta?

--

Akka hardhaa mitiim –

Boru bayyaannadhe

Anis akka namaatti –

Toorarra dhaabadhee

Naman sifakkeessa –

𝐑oorroo sirraa cabsee

Hinbooyinkaa maalo –

Harmeeko yaa obse!

--

Yaa guduunfattuuko –

Sabbata uumamaa

Yaa kaleessituukoo –

Situ naaf arjoomaa

Yommuu ati boochu –

Onneenko naboo’e!

Imimmaanke duukaa –

Qalbiinko boora’ee

Imimmaanke dhiiga –

Dhiiga haadhummaati

Jiruukoof situ hiikaa –

Maalo hinbooyinka ati!

__________ /___________

𝐀𝐚𝐲𝐲𝐨𝐥𝐢𝐢𝐟 𝐠𝐮𝐦𝐚𝐚𝐭𝐚!

Madda: Jõôráä Jaarràå

karaatti na dhiistee...!

 Dhugaan si jaaladhee

si'iin yakkamuunkoo

Badii tokko malee

si'iin shakkamuunkoo

Alaabaa jaalalaa

Maqaakeen dhaabuukoo

waltajjii onnee kootti

si qofaa waamuunkoo

Onnee dhiiga cobdeef

hirqee arganuunkoo

ija imimmaan roobse

si'iin ganamuunkoo

Amanuu dadhabee

sagal mil'achuukoo

garba gaabbii seenee

bahuuf miixachuunkoo

Oofkaltii na dhorke.....

Ulfa Xurree keenyaa

shiran gatachiistee

utuun galma hin geenye

karaatti na dhiistee!

Marsii D Faajjiitiin

Dur...

Dur...

Damma-holqaa muuxanna

Durillee durattillee

Ija mukaa sooranna

Dhamdhamnee walii fillee

Inqooxoofi goosuu

Damma xuuxxoofi goraa

Bosona keessaa coranna

Mukni jaalalaan hora

Muka ixaanaa fuunfachaa

Bu'anna ija arbuu

Amma hunduu dhangaggaa'ee

Jabanni didde darbuu

Rigaa mi'eessaa murree

Ilkaan rigachuun hafee

Silaa kan mukaa wayya

Kan namaa nyaanne lafee

Dhaga'uu dharraanekaa

Tapha weenniif qamalee

Qalbiidhaan rarraanekaa

Waca simbiraaf gar-malee

Raawwata hawwiin keenya

Takka bubbula malee

Gumaa kadhachuu hinoolu

Yeyyiin hoolota qale

Firiif gaaddisa waliin

Sanyiin mukaa haafufu

Qacceen namaas hincitin

Latee borutti haalufu

Barri hadhaaye darbee

Barri mi'aawu haadhufu!

By: Diriba Hambisa

Baallii

Wal qabatoo akka -gaarren Himaaliyaa

Warra duudhaa -warra abbaa biyyaa

.

Warra gadaan shanii - warra garaan tokkoo

Qe'ee ardaa jilaa - gumii Me'ee Bokkoo

.

Wirtuu Dimokraasiiti -madda qaroominaa

Oromummaan faaya; Gadaan quufaa gabbina!

.

#Elaamee...

Qilleensi baraa -sin hin raasiin!

Bineensi addaan -sin hin baasiin!

.

Addaafi Addunyaa -isiniif haa laatu!

Amajaajni keessan -habaqii haa taatu!

.

Akka laga Abbayyaa -guutaa dambali'aa

Fagaadhaa qaari'aa -lafa yaaddan ga'aa

.

Halaalaa mul'adhaa -akka urjii gaalessaa

Isiniif haa laatu -umrii harraagessaa!

Woluman Urgesa

Feb 21/2024

#Harmufa #Roobalee #Mudana #Halchisa #Dhallana

#Gujii #Gadaa #Oromo #Oromia

Photo Credit:

Visit Oromia

Walif tv

Waloma

Boru Meshi

Imalticha

 Imaltichi, lafa fagoo

Hin hidhanne, galaa qoonqoo.

Willee golaa - mashaaqula

Hin qicanne, bishaan tolaa.

Harka qullaa, maaliif ka'ee?

Eboo gatiin, qaalii ta'ee?

Ulee okkoon, qaanii ta'ee?

Manaa ba'uu, ga'uu se'ee?

 

Kunootika, talbaajja'ee

Dheebuun qabnaan, karaa ba'ee

"Bishaan" jechaa, laga bu'e.

Dhugee, guutee garaatti

Dhufee bu'ee karaatti.

 

Xiqqoo deemnaan - laf-muraasa

Beelli "any" goote - marrumaansaa.

Achi ilaalee - ganda fuullee

"Midhaan" jechaa, it'qajeele.

 

Mana guddaa, dallaa qabu

Gaafa goree, karra dhiibu

Edaa jarri, saree qabu.

Sareen warraa, tokko dunnaan

Namicha'rraa, qalbii fuunaan

Gooftaa saree, dhaba ulee

Jeeja garaa, naasuun qolee

"Uu... uu" jechaa, ximbiriire.

 

Dheebotee bishaan yaadate

Beela'ee galaa yaadate

Baqatee ulee yaadate.

Imaltichi, talbaajja'u

Dadhabu'llee, galma ga'uu

Dhiistee hin beektu, aduun dhi'uu.

By: Abraham Tesfaye Gudina

 

Si haa galatu!

"Mannikee gubbaa gaaraa 

tabbakee maaltu baha

Guddaa hunda gararraa 

ammakee maaltu gaha?"

.

Jedhanii si leellisu 

kitilli seelotakoo 

Arjummaakee weeddisu 

kutaaleen qaamotakoo

.

Si jaju, siif ijaajju

Si saadu, si kabaju

.

Gaarummaakee mararfatu

Waaqummaakee maganfatu

.

Ka darbeef si jajatu,

Egereef  si abdatu!

Si haa galatu

 Woluman