Haasaa Maanguddoota Handaara Keenyaa (kutaa 2ffaa)

1. "Yaa Laalo sila naaf gootanii,

Harkaan qolataa

Lukaan baqataa...!"

jedhe Dammaqaa Lataa (Abbaa Muluu)

...

2. Isin isinuma!" jedhe Abdiisaa Margaa/Abbaa Mararaa.

...

3. "Asis garagali; achis garagali; qe'eenoo kankeetii!" jedhe Abdiisaa Margaa/Abbaa Mararaa.

.

4. "Raafuu intala namaatuu nyaadheen galee, kaasi na duraa!" jedhe Abbaan Mararaa (Abdiisaa Margaa)

.

5. "Ittuma siqi Wayyeessaa yaa kormakoo!" jedhe Abbaan Furgaasaa /Xuurii Qalbeessaa/

.

6. "Ilaa inni fardakoo nyaate isa kana!" jedhe Waaqumaa Gurmeessaa (Abbaa Lassee)

.

7. "Yaa gooftotakoo ishii kanammoo Abbaa Daaleetu isinitti dabale" jedhe Abbaan Furgaasaa/ Xuurii Qalbeessaa/

...

8. "Irroo yaa abbaa Xurunaa

Itti beekta durumaa!" jedhe Xurunaa Irreensoo (Abbaa Booraa)

...

9. "Irranaatu jedhemoo isa irranaatu jedhe?" jedhe Abbaan Mikkir.

.

10. "Booqiteen omaa si finciluu didde mitii Abbaa Addunnaa?" Jedhe Dhiyanaa Dabalaa(Abbaa Cirrii)

.

11. "Omaa shish na hingoonee, buqqurii namatti qabi Gaddisee" jedhe Abbaan Addunnaa ( Itichaa Bifeessaa)

12. “Uffata akka abbaatti hodhu" jedhe Ulfaataa Hirphasaa (Abbaa Gaatoo)

.

13. "Durattoo wayiifii, ammammoo maaliifi?" jedhe Abbaan Taliiloo (Tolawaaq Magarsaa)

.

14. Duruu nan tolchee reenfatti fokkoruu!" jedhe Alamuu Injiguu (Abbaa Tarrafaa)

.

15. "Sagal sagal dhugnee nu qaqqabi!" Jedhe Dabaree Miidhaksaa.

...

16. "Isa qabuun 'dhabe' hinjedhani; hiyyeessaan 'dadhabe' hinjedhani;

qotee qabatee karra warra Abbaa Firaa, Firoomsaa duraa nama hindhabani; gooroo Laaloo taa'aniimmoo jecha hindhabani!"

Haadha Qophee/ Doshoo

.

17. "Eeguma Abbaa Booqee dideeyyuu, Waaqni hincaamu!" jedhe Shallamaa Tasammaa (Abbaa Ayyalaa)

18. “Baddeetta yaa gadhittii, saanikee Ulaa Lubbuu geesse!" jette Dasii Gurmeessaa (Haadha Boruu)

*******

19. "Hinwayyooftaa sila yaa Araarsaa!" jette Kitaabee Dhiyanaa (Haadha Abbabaa)

Haasaa Maanguddoota Handaara Keenyaa (Kutaa 1ffaa)

1. “Caboon maquma kooti

Cabittiitu cabsa kooti

Kan cabittii naan jette

Iddoo torbatti cabi

Ogeessa torba dhaqi

Torbanuu manaa dhabi

Siin jedheera Abbaan Gabii!"

(Injiguu Badhaasaa /Abbaa Gabii❩

2.“Kottee sangaa diimaa

Kottee sangaa diimaa

Yaa Abdiisaa Margaa,

Qoteet namaaf dhiisa!"

Jette qamaleen yaa'a Saarfajjii

❨Abdiisaa Margaa/Abbaa Mararaa❩

3. "Gaafa hiyyeessi hindaaqqoo bitate, amma ishii jalaa ajjeesutti Waaqni rafee hinbulu."

❨Abarraa Ciibsaa)

4. "Cuucii hindaaqqoo firfaarii biddeenaatiin guddatteefi ijoolleen barakaa bunaa mi'eeffatte, gaafa keessummaan dhufe manaa nama baafti."

(Abarraa Ciibsaa)

5. "Biddeen dhabaaf malee, itti-nyaata dhabaaf jedhee eenyutu mana namaatti galee beeka?“

❨Abarraa Ciibsaa❩

6. "Sareen itti-nyaataan nyaattii kan akkatti kaattu!"

❨Abarraa Ciibsaa❩

7. "Bunni intala namaa

Shiinum lama lama!"

❨Abdiisaa Margaa/Abbaa Mararaa)

8. “Labuuttan gala malee laguuttan gala na seetee!"

Waaqumaa Gurmeessaa/Abbaa Lassee

9. "Erga bokkaan caamee dondaa naaf fiddaa?“

❨Dassee Injiguu/Abbaa Boruu❩

10. " Boru sargii kootii, ani asiin ibidda qaqqaammadha!"

❨Hirphaa Injiguu/Abbaa Lassee❩

Warri soddaa intala heerumteen maal jedhenii arrabbsu?

 

Warri soddaa intala heerumteen maal jedhenii arrabbsu?

Kan akkashee argatte isheenoo

Akaafaan ejjata miinzeenoo

Shafaafaa muujaleen naannoo

Bargaanfataa dhufte kuunnoo...

Kan haati dhaltee

Kosii keessa keesse

Jaartiin qoortuun kuni

Akkamiin har'a geesse

Yeroo mana abbaakoo dhuftu

Maaltu boquu si cabse

Maaltu si qaanesse?

Ol jedhii natti himi

Eda Urroo dibattee

Diinqa harmee kee teessee

Maalfaa jettee boosse?

Yeroo ati gadditu...

Hiriyeen dhageessee

Firri fagoof dhiyoo

Kan walitti odeesse...

Akkas jettee boossee?

"Irraangadeen kufee

Irraanfadheen dhufee

Karaa kooraa jalaa

Moccooree moccooree

Ani maalan godhee?

Obboo kootoo godhee

Anoo fideen dhufee

Kooraa fardaatu fixee?

qoraan dhaqnaan badee

Kolaafamee badee

Boo'ee na kadhannaan

Innoo na mararran

Suubboof kenneen dhufee..."

Jedhee si'ii boo'u

Hundatu dhaga'ee

Ollaan yoo haasa'u.

Muka arbaa gaaddisa Leensee

Durbummaa gaaddisa keessee

Isafaa gaabbita teessee

Sii ofonfolee si fardatu godhee

hammi Gandaa si hobobsaa

munneen Kee dhiiga coccobsaa

Gidaamiin talbaa facaasaa

Inshilaala naannesseetoo

Injiraan sitti haa naqumee

Qinxiraama naannesseetoo

Kan funyaan cilaattii

Eessa Koo jibbitaa?

Kan wannoon gurraattii

Kan wandaboon udduurraan ciccitaa

Abidaaruu galatee..

Yoo si dhiisan maal qaba?

Kan si caalutu dhalatee

Gatamaan baala harcaafate

Eessaa fuute yaa Obbookoo

Gatamtuu biyyi irraanfate

Birriin obboo saanduqii tokkoo

Niitiin obboo waan silmii tokkoo

Egaa hin baddee yaa birrii obboo

 Madda: Alex Taye

Warri soddaa gurbaa fuudheen maal jedhenii arrabbsu?

Warri soddaa gurbaa fuudheen maal jedhenii arrabbsu?

"Yaa soddaa Obboo sooressaa 

Soddaan argaa na dabarsaa

Diinqan darbaa na dabarsaa

Mana abbayyoo koo - mana abbaa hintalaa

Hoolaan aseentee - Gilgilii fixxee

Mana abbayyoo koo - mana abbaa gurbaa

Golfaan aseentee - sinkirii dhiqxe

Yoo sareen gamanaa dutte

Yoo sareen gamasii dutte

Soddichoo silaa dabeessaa

Gadi kaateee cufaa jabeessa

ol kaatee haadhatti odeessa

albaatiin goorroo balleessa

fincaaniin daaraa basseesa

Haa cabu dhiira shan keessaa!

Ari'aa asii balleessaa

kun gurra dhiiraa balleessa

Maaf lafa ilaalaa?

Silaa dhalaa dhaa?

Mee jala ilaalaa.

Maaf lafa ilaaltaa?

Sodaachuu feetee?

Maaf karaa ilaaltaa?

Baqachuu feetee?

Asiinooo anaa

Achiinoo manaa

Karaa kam baataa?

Hardhuma albaataa!

Albaatu hin harta

Hartu hin salphatta!

Hojjaa dheerattaa

Riqichaaf toltaa

Sirra adeeminnaa..

Garaa baldhattaa

Dinnichaaf toltaa

Sitti affeelinnaa?

Jiini aduu qabaa

Hinifuuf malee

Yoo ifes maali?

Ani oduu qaba

Hin himuuf malee

Yoon himes maalii?

Soddeen ulfaaye

Da'a wallaale

Yaa Maaram hiiki

Mucaa harkaa miidhi.

Waddeessa gaaraa

Fardeen jigsitee

Jalli awwaarofte;

Magan yaa sodde

Qaccee si jalaa

Nadheen jibbite

Garbi ayyaanofte

Baga qaanofte.

Aabbee soddaa koo

Alangaa raaftaa

Munnee na dhaantaa?

Otuu na dhaantee

Shantama baafta

Dhibbaan samaanta.

Shantamni koo ti

Dhibbi kan mootii

Yaa sodde mooji!

Durba hin fuutu yaa suubboo

Gatiin Keenya jaatama

uwwisaan torbaatama

Jedhee dhaame abbaan durbaa

Dhaggeeffadhu yaa gurbaa!

Cidhaan keen argee

Kan jilbaan qixxee

Nallee hin saalfattuu?

Saphii hin aaddattuu?

Cidhaan keen argee

Kan cittoon fixxee

hin sassaabbattuu

kan gad baafattu ?

Agadaa baala duroo

Inni akkas kooru kunoo

Garbicha Keenya duroo

Yaa hiree rooba ...Yaa hiree

Akka naan jedhee Soddaan Koo

"Haadha Koo beektaa?" Naan jedhe

Haadha isaa maalin wallaalee

dhaabii tamboo irra gugguuftii

Akka harree dhaltuu dhudhuuftii

Agadaa ishee mukaan Mukoo

Soddaa Koo ishee munneen bukoo

Itti buufaa hin bilcheessinaa

Sanyii namaan qixxeessinaa

Somaa eeboo cabaa

wayyoo eeboo dhabaa

Hiriyee koon dhabaa

Fudhatee sokka kunooyee

Agadaa qaaruutti nyaatuu

Soddaan Koo maal ta'ee jamaa?

Kan cidhaan kaasutti baatuu

Barbaree baala sukkaaraa

Akka waan qotee as kaa'ee

Marmaree maa itti cuqqaalaa?

Arangamaa baala daggalaa

Gad baaseen miicca surree Kee

Ol fuudheen dhiita munnee kee

Yaa Gufuu baala Eebichaa

Dhuufuuf jirta dhudhuuftichaa

Maaliif karaa na eegsista?

Akaayii garbuu Qorii fallaanaa

Ati akaakuu Hin qabduu

gurbaa sooromni Ayyaanaa...."

Madda: Alex Taye